सरकार लगानी सम्मेलन गर्ने तर वजेट खर्च गर्न नसक्ने : नेता सिंह

सरकार लगानी सम्मेलन गर्ने तर वजेट खर्च गर्न नसक्ने : नेता

काठमाडौँ, १६ चैत : नेपाली काङ्ग्रेसका नेता प्रकाशमान सिंहले सरकारले लगानी सम्मेलन गरेर वस्ने तर विकास वजेट खर्च गर्न नसक्ने वताएका छन् ।

नेपाली काङ्ग्रेस टोखा नगरपालिका–११ ले आज यहाँ आयोजना गरेको ‘वडा भेला, नयाँ वर्षको शुभकामना आदानप्रदान तथा चियापान’ कार्यक्रममा उनलेले विदेशी लगानी भित्र्याउन सरकारले लगानी सम्मेलन गर्नु राम्रो कुरा भए पनि विकास बजेट खर्च हुन नसक्नु दुःखद भएको बताएका हुन ।

नेता सिंहले स्थानीय तथा प्रदेश सरकार सञ्चालनका लागि चाहिने आवश्यक ऐन, कानून, नीतिनियम बनाउन ढिला गरेर सरकारले सक्षमताका साथ सरकारको नेतृत्व गर्न नसकेको आरोप लगाए ।

फरक प्रसंगमा नेता सिंहले विधि र पद्दतिअनुसार चल्न नसक्दा पार्टी कमजोर भएको वताए ।

“मुलुकका हरेक परिवर्तनको नेतृत्व गरेको काङ्ग्रेसले आर्थिक विकासको नेतृत्व गर्न सकेन,” उहाँले भन्नुभयो । पार्टीका पूर्व महामन्त्री सिंहले महाधिवेशन भएको तीन वर्षसम्म पनि पार्टीका विभिन्न विभाग गठन हुन नसक्नुले पार्टीलाई झन कमजोर बनाउँदै गएको वताए ।

काङ्ग्रेसले इतिहासले मात्र भजाएर हुँदैन भविष्यका लागि सोच्नु जरुरी रहेको उनकाे भनाइ छ ।

काङ्ग्रेस नेता भीमसेनदास प्रधानले पार्टीभित्र देखिएको गुट उपगुटको अन्त्य गरी आगामी निर्वाचनमा पहिलो पार्टीका रुपमा स्थापित गर्नुपर्ने बेला आएको बताउनुभयो । “काङ्ग्रेसले आगामी निर्वाचनका लागि आजैदेखि सङ्गठन निर्माणमा लाग्नुपर्छ,” उनले भने ।

प्रकाशित : २०७५, १६ चैत्र शनिबार २३:१५