चित्लाङ-थानकोट सडक मंसिर अन्तिमसम्म निर्माण गरिसक्ने ठेकेदार सहमत

  • 34
    Shares

९ साउन, वीरगञ्ज । ठेकेदार कम्पनीको लापरबाहीका कारण निर्माणाधीन चित्लाङ-थानकोट सडक अलपत्र अवस्थामा छ ।

गणेशमान सिंह राजमार्गका रुपमा परिचित सडक निर्माणको जिम्मा पाएको किराँतेश्वर कन्स्ट्रक्सनले काममा लापरबाही गरेको भन्दै स्थानीयले विरोध गर्दै आएका छन् ।स्थानीयले छिटो सडक निर्माण कार्य सम्पन्न गर्न निरन्तर दबाव दिइरहेका छन् । सुरुङ निर्माणको समेत योजना रहेको २२ किलोमिटर लामो थानकोट-चित्लाङ सडक उच्च प्रविधियुक्त र छिटो बनाउनुपर्ने भए पनि त्यसो हुन सकेको छैन ।

ठेकदार कम्पनी पिएस/किराँतेश्वर जेभिको लापरबाहीका कारण चित्लाङका मात्रै नभएर आसपासका गाउँका बासिन्दाले समेत सास्ती भोग्दै आएका छन् ।

पर्यटकीय गाउँ मकवानपुरको थाहा नगरपालिका स्थित चित्लाङलाई थानकोटसँग जोड्ने गणेशमान मार्गमा ठेकदारले काम नगरी बाटो मात्रै बन्द गरेर सास्ती दिएको भन्दै गत जेठमा स्थानीयले जर्बजस्ती बाटो खुलाएका थिए ।

पछिल्लो पटक थाहा नगरपालिका वडानम्बर ९ र १० का वडा अध्यक्षसहित स्थानीय बासिन्दाले कलंकीस्थित सडक आयोजना कार्यालय पुगेका छन् ।

उनीहरुले सडक छिटो भन्दा छिटो निर्माण सम्पन्न गर्न सरोकारवालालाई दवाव दिनुको साथै लिखित सहमति समेत गराएका छन् ।

आयोजना प्रमुख ध्रुव नारायण पाण्डेय र निर्माण कम्पनीका प्रतिनीधि सनक सिंह राई समेतको उपस्थितिमा मंसिरसम्म सडक निर्माणको काम सम्पन्न गर्नेगरि सहमति गराइएको छ ।

सहमतिमा गाणेशमान सिंह मार्ग -थानकोट चित्लाङ सडक योजना ठेक्का नम्बर ३३७११०४ ०७२/७३ -००२ को कार्य साउन १५ गतेबाट सुचारु गराउने निर्णय गरिएको छ ।

त्यस्तै ठेक्काको सम्पूर्ण कार्य ०७६ मंसिर मसान्तभित्र सम्पन्न गर्ने, बैकल्पिक मार्ग मातातीर्थ- चखेल-चित्लाङ सडकखण्डको मर्मतका लागि थानकोट चित्लाङ सडक योजना मार्फत सडक विभागसँग आवश्यक बजेटमाग गर्ने सहमति भएको छ ।

बैकल्पिक मार्गको अवस्था आवत्जावत् उपयुक्त नभएको गएको जेठमा स्थानीय बासिन्दाले निर्माणाधीन मार्गको काम रोकेर आवागमन सुचारु गराएका थिए ।

त्यसैगरी गणेशमान सिंह मार्गलाई दसैं र तिहार जस्ता चाडपर्वका लागि भने अस्थायी रुपमा सञ्चालनमा ल्याउने सहमति भएको चित्लाङका अगुवा बुद्धरत्न मानन्धरले जानकारी दिए । ‘अब काममा आलटाल सैहृय हुनेछैन । आयोजना कार्यालय र निर्माण कम्पनीले मंसिर मसान्तसम्म काम सम्पन्न गराउने सहमति गरेका छन् ,’ उनले भने ।

स्थानीयले थाहा नगरपालिका वडा नं ९ र १० का कर्मचारी समेत राखेर सडक निर्माण कार्यको दैनिक अनुगमन गर्ने र लापरबाही गरेको पाइएको खण्डमा झन् कडा कदम चाल्ने चेतावनी समेत दिएका छन् ।

वडा नं ९ का अध्यक्ष परशुराम श्रेष्ठले निर्माण कम्पनीले चार महिना समय दिएको खण्डमा काम सम्पन्न गर्ने आश्वासन दिएपछि एक पटकलाई मौका दिइएको बताए ।

चित्लाङ-थानकोट सडकलाई थाहानगरको मुख्य विकासको मार्गको रुपमा लिने गरिएको छ । सडक निर्माण सम्पन्न भएको खण्डमा चित्लाङ, बिसिंखेल, टिस्टुङ बज्रबाराही मात्रै नभएर पालुङमा उत्पादित तरकारी राजधानी पुर्‍याउन र त्यस क्षेत्रका बासिन्दालाई आवतजावत् गर्न सहज हुन्छ ।

भौतिक पूर्वाधार तथा यातायात मन्त्रालय, सडक विभाग, आयोजना कार्यालय लगायतले तदारुकता नदेखाउँदा निर्माण कार्यले तीव्रता पाउन नसकेको स्थानीयले बताउँदै आएका छन् ।

समयमा काम नगर्ने ठेकदार कम्पनीले त्यस क्षेत्रबाट ढुंगा निकालेर बेच्दै आएको आरोपसमेत लाग्दै आएको छ ।

प्रकाशित : २०७६, १० श्रावण शुक्रबार २०:५०