राष्ट्रिय जनमोर्चाले पार्टीबाट निर्वाचित वडाध्यक्षको जापान भ्रमण रोक्यो

बाग्लुङ / बाग्लुङको जैमिनी नगरपालिका–५ का वडाध्यक्ष गोपालप्रसाद शर्मालाई राष्ट्रिय जनमोर्चा (राजमो)ले विदेश भ्रमण गर्न रोकेको छ । उनी सो पार्टीबाट निर्वाचित वडाध्यक्ष हुन् ।
नगरपालिकाको खर्चमा जापान भ्रमण जान लागेका उनलाई पार्टीले रोकेको हो । नगरपालिकको खर्चमा जापान भ्रमण गर्नु अनुचित भएकाले रोकेको राजमो बागलुङका अध्यक्ष अमर थापाले बताए । ‘नगरपालिकाको खर्चमा विदेश घुम्न जानु उपयुक्त होइन भन्ने हाम्रो धारणा हो,’ उनले भने, ‘पार्टीले रोकेपछि उहाँ जापान नजाने हुनुभएको छ ।’

नगरपालिकाको खर्चमा नगरप्रमुख ईन्द्रराज पौडेलसहितको टोली जापान भ्रमणमा जाने भएपछि त्यसको आलोचना भइरहेको छ । ‘पार्टीले जापान भ्रमण नजानु भन्यो मैले त्यसलाई सहस्र स्वीकार गरेँ’ वडाध्यक्ष शर्माले भने ।
‘द वल्र्ड भिजन’ नामक गैरसरकारी संस्थाको निमन्त्रणामा नगरप्रमुख पौडेलको नेतृत्वमा छ सदस्यीय भ्रमण टोली सोमबार जापान जाँदैछ । नगरप्रमुख इन्द्रराज पौडेलले सात सदस्यीय टोली भ्रमणमा जाने निश्चित भएकोमा एकजना वडाध्यक्षले पार्टीको अनुमती नभएको भनेर जान नसक्ने जानकारी गराएको बताए ।

नगरप्रमुखको नेतृत्वमा हुने भ्रमणमा प्रमुख प्रशासकीय अधिकृत ईश्वरीप्रसाद शर्मा, वडा २ का अध्यक्ष लक्ष्मीप्रसाद सापकोटा, वडा  २ का सदस्य प्रेमप्रसाद सापकोटा, वडा ६ का सदस्य केशव चालिसे र नगर कार्यपालिका सदस्य लालबहादुर परियार जाने नगरपालिकाले जनाएको छ । भ्रमण टोलीमा पूर्व सासंद प्रकाश शर्मा पौडेल, सुन्तलाचौर माविका प्रअ नन्दलाल सापकोटा र अर्का एक स्थानीय भने व्यक्तिगत खर्चमा जान लागेको नगरपालिकाका प्रमुख प्रशासकीय अधिकृत ईश्वरीप्रसाद शर्माले जानकारी दिए ।

चालू आवका लागि भ्रमण शीर्षकमा छुट्ट्याइएको दश लाख बजेटमा नगरपालिकाको टोली जापान जान लागेको हो । ‘नगरसभा र कार्यपालिकामा व्यापक छलफल गरेर भ्रमणबारे निर्णय भएको हो,’ नगरप्रमुख पौडेलले भने, ‘अत्यन्त न्यून खर्चमा जाँदैछौँ, भ्रमण उपलब्धिमूलक बन्नेमा ढुक्क छौँ ।’

भ्रमणमा बोलाउने संस्थाले जैमिनी नगरपालिकामा विद्यालय भवन निर्माण, एम्बुलेन्सलगायतमा सहयोग गरेको जनाइएको छ । उक्त संस्थाबाट थप सहयोग लिन र जापानको विकासबाट केही सिक्न भ्रमण फलदायी हुने नगरपालिकाको दाबी छ । भ्रमणको कार्यसूचीमा जापानको ओसाका नगरपालिकासँग भगिनी सम्बन्ध स्थापनाका लाग प्रस्ताव गर्नेसमेत उल्लेख छ ।