क्वारेन्टिनमा मृत्यु भएका युवकमा कोरोना पोजेटिभ, मृतकको संख्या सात पुग्यो

  • 117
    Shares

दैलेखको दुल्लु नगरपालिकामा रहेको क्वारेन्टिनमा मृत्यु भएका युवकको कोरोना भाइरसको परीक्षण गर्दा रिपोर्ट पोजेटिभ आएको छ।

सामाजिक विकास मन्त्रालयको स्वास्थ्य महाशाखा प्रमुख डा. लक्ष्मी नारायण तिवारीले युवकको नतिजा पोजेटिभ आएको पुष्टि गरेका हुन्।

तीन दिनअघि युवकको स्वाब परीक्षणको लागि कर्णाली स्वास्थ्य विज्ञान प्रतिष्ठान जुम्लामा पठाइएको थियो।

दुल्लु नगरपालिकाले सञ्चालन गरेको क्वारेन्टाइनमा बसेका ४० वर्षीय पुरुषको शनिबार बिहान मृत्यु भएको हो।

शनिबार बिहान चिया खाइसकेपछि हिँड्दै गर्दा उनको मृत्यु भएको थियो।

भारतबाट फर्किएका उनी क्वारेन्टिनमा बसेको १० दिन भएको थियो।

उनी १० दिनअघि भारतबाट आएर क्वारेन्टाइनमा बसेका थिए। दुल्लु नगरपालिकाले उनीसहितको समूहलाई भारतीय सीमा क्षेत्रबाट उद्धार गरेर दैलेख ल्याएको थियो।

यद्यपी स्वास्थ्य मन्त्रालयले भने आधिकारिक जानकारी दिएको छैन। योसँगै नेपालमा कोरोना भाइरस संक्रमणले मृत्यु हुनेको संख्या सात पुगेको छ।

प्रकाशित : २०७७, १७ जेष्ठ शनिबार १८:४९