हिरासतमा युवक मृत्यु प्रकरणः एसपी रविराज खड्काविरुद्ध मुद्दा दर्ता

  • 2
    Shares
२४ भाद्र काठमाडौ । थुनामा रहेका बेला युवकको मृत्यु भएको घटनामा पीडित परिवारले जिल्ला प्रहरी प्रमुखसहित ६ जनाविरुद्ध जाहेरी दिएको छ ।
इलाका प्रहरी कार्यालय गरुडाको हिरासतमा मृत्यु भएका १७ वर्षिया विजय महराका बाबु पनिलाल महराले यातना र ज्यानसम्बन्धी कसूरमा अनुसन्धान गर्न रौतहटका प्रहरी प्रमुख एसपी रविराज खड्कासहित ६ जनाविरुद्ध जिल्ला सरकारी वकिल कार्यालयमा जाहेरी दिएका हुन् ।
एसपी खड्कासहित तत्कालिन इलाका प्रहरी कार्यालय गरुडाका प्रहरी नायब उपरीक्षक (डीएसपी) ज्ञान कुमार महतो, प्रहरी निरीक्षक (इन्सपेक्टर) नविन कुमार सिंह, प्रहरी नायब निरीक्षक (सई) विरेन्द्र यादव र हवल्दारद्धय मुन्ना सिंह र फिरोज धुनियाविरुद्ध मुर्दा दर्ता भएको हो ।
बुधबार विजयरामको बुबा पनिलाल महराचमारले एसपी खड्कासहित ६ जनाविरुद्ध जिल्ला सरकारी वकिलको कार्यालयमा यातना तथा ज्यान सम्बन्धी कसुरमा मुद्दा दर्ता गरेको जिल्ला न्यायधीवक्ता सुवास कुमार भट्टराईले  जानकारी दिए ।
एसपी खड्कालाई १८ भदौमा रौतहट प्रहरी प्रमुखको जिम्मेवारीबाट खोसेर प्रहरी प्रधान कार्यालय नक्साल तानिएको छ । खड्को ठाउँमा एसपी सिद्धिविक्रम शाहलाई पठाइएको छ ।
यस्तै, इप्रका गरुडाको प्रमुखको जिम्मेवारी खोसेर डीएसपी महतोलाई प्रदेश प्रहरी कार्यालय जनकपुर तानिएको छ । हाल उनको ठाउँमा डीएसपी नरेन्द्र कुँवरलाई पठाइएको छ । त्यस्तै इन्सपेक्टर सिंह र हवल्दारद्वय सिंह र धुनियालाई ६ महिनाको लागि गृह मन्त्रालयले १६ भदौमा निलम्बन गरेको थियो ।
गरुडा नगरपालिका–८, जिगंडवाका २० वर्षीय निरन्जन रामको हत्या गरेको अभियोगमा विजयरामलाई साउन ३२ गते प्रहरीले पक्राउ गरेको थियो । प्रहरी हिरासतमा रहेकै बेला गम्भीर अवस्था भएपछि उपचारका क्रममा वीरगञ्जमा उनको मृत्यु भएको थियो ।
१९ वर्षीय विजयको शरीरभरि निलडाम र घाउचोट भेटेपछि परिवारले प्रहरीको कुटपिटका कारण मृत्यु भएको दाबी गर्दै आएका छन् । विजयलाई हिरासतमा हत्या स्वीकार गर्न चरम यातना दिएको पीडित परिवारको आरोप छ ।साभार राताेपाटी न्युजडट कम
प्रकाशित : २०७७, २४ भाद्र बुधबार १७:१६