काठमाडौं । राष्ट्रिय जनमोर्चाका अध्यक्ष एवं सांसद चित्रबहादुर केसीले बजेटमाथिको अहिलेको छलफल जनता झुक्याउने नाटक मात्रै भएको बताउनुभएको छ ।
आइतवार संसदबाहिर सञ्चारकर्मीहरुसँग कुरा गर्दै उहाँले उहाँले बजेटमाथिको अहिलेको छलफल जनता भुल्याउने काम मात्रै भएको बताउनु भयो ।
उहाँले सिद्धान्ततः बजेट संशोधन गर्न नमिल्ने भन्दै बजेटमा भेदभाव गरिएकोले पास हुन नसक्ने बताउनुभयो ।
उहाँले भन्नुभयो, ‘सिद्धान्ततः कुरा गर्ने हो भने बजेट संशोधन गर्न मिल्दैन । तर नेपालमा जे पनि गर्न मिल्छ । बजेटमाथिको छलफल नाटक मात्रै हो, औचित्य छैन । यो समय बिताउने मात्रै हो ।’
उहाँले अहिलेका राजनीतिक दलहरुले संसदीय पद्धतिका कुरा गर्नु जनतालाई उल्लु बनाउनुसरह भएको बताउनु भयो । उहाँले जनतालाई झुक्याएर सत्तामा रहनुको नाटक मञ्चन राजनीतिक दलहरुले गरिरहेको बताउनु भयो ।
अध्यक्ष केसीले बजेटमा भेदभाव र अन्याय गरिएको बताउनु भयो ।
उहाँले भन्नुभयो, ‘नेपालमा आफूलाई चाहिएको जे पनि संशोधन गर्छन्, जनतालाई देशलाई चाहिए नियम र सिद्धान्तको कुरा गर्छन् । खर्च कटौति गरी रुपैयाँ कायम गर्नेकुरा बेकारको कुरा हो । यिनीहरुले संसदीय पद्धतिका कुरा गर्ने जनतालाई उल्लु बनाउनुबाहेक केही होइन । मुख्य कुरा दाउपेच र कसलाई छक्याएर सत्ताको रस्वासदन गर्नुपर्छ भनेर नाटक गरिरहेका छन् । बजेटमा भेदभाव छ । अन्याय छ । बजेट पास हुन कठिन छ ।’
