काठमाडौँ । राष्ट्रिय जनमोर्चाले फ्रान्सको पेरिसमा जारी पारालिम्पिक्समा पलेशा गोवर्धनको जितप्रति बधाई ज्ञापन गरेको छ ।
केन्द्रीय उपाध्यक्ष तथा प्रवक्ता दुर्गा पौडेलको हस्ताक्षरमा २०८१ भदौ १६ गते आइतबार जारी प्रेसवक्तव्यमार्फत राजमोले बधाई ज्ञापन गरेको हो ।
सन् १९६४ देखि ओलम्पिकमा सहभागिता जनाए पनि इतिहासमा पहिलोपटक पलेशाले कास्य पदक हासिल गरेको भन्दै राजमोले उनको खेलकुद क्षेत्रमा अझ उच्चस्तरको प्रगतिको कामना व्यक्त गरेको छ ।
यस्तो छ, प्रेसविज्ञप्तिको पूर्ण पाठ :
“यही भदौ १४ गते शुक्रबार फ्रान्सको पेरिसमा जारी पारालिम्पिक्सअन्तर्गत तेक्वान्दोकी खेलाडी पलेशा गोवर्धनले ऐतिहासिक कांस्य पदक जितेकोमा राष्ट्रिय जनमोर्चा हर्ष प्रकट गर्दै बधाई ज्ञापन गर्दछौँ ।
उनले के–४४ क्याटेगोरीअन्तर्गत महिला ५७ केजीमुनि सर्बियाकी मारिया मिसेभलाई १५–८ ले पराजित गर्दै पदक जितेकी छिन् । नेपालले सन् १९६४ को टोकियो ओलम्पिकदेखि सहभागी जनाउन थालेपछि कांस्य पदक हासिल गरेको यो पहिलो अवसर हो । यसअघि ओलम्पिकमा नेपाली खेलाडीको उपस्थिति सहभागितामा सीमित भएकोमा पलेशाले छ दशक लामो ओलम्पिकमा पदकविहीन यात्रा अन्त्य गर्दै ओलम्पिकमा पदक जित्नु नेपालको लागि गर्वको विषय हो ।
हामी पलेशाको खेलकुद क्षेत्रमा अझ उच्चस्तरको प्रगतिको कामना गर्दछौँ ।”
