२०८२ चैत १४ गते राजमो सिद्धार्थनगर नगर समितिले आयोजना गरेको चुनावी समीक्षा भेलामा प्रमुख अतिथिको आसनबाट मनतव्य राख्दै उहाँले सो धारणा राख्नुभएको हो ।
‘गौरीबहादुर कार्कीको प्रतिवेदनले भदौ २३ गतेको घटनाप्रति बढी समय खर्चिएको छ तर भदौ २४ गतेको विध्वंसप्रति चुप बसेको छ’ उहाँले भन्नुभयो– ‘तसर्थ यो प्रतिवेदन सरकारपक्षीय देखिएको छ किनकि घटनामा सार्वजनिक रूपमा संलग्न व्यक्ति, संस्था र पार्टीबारे प्रतिवेदन मौन छ ।’
उहाँले भदौ २४ गतेको घटनामा रास्वपा, राप्रपा तथा माओवादीका कार्यकर्तासमेत सामेल रहेको कसैबाट नलुकेको दाबीसमेत गर्नुभयो ।
उहाँले विगतमा सरकारमा रहेका कङ्ग्रेस, एमाले र तत्कालीन माओवादीले आलोपालो गरी सत्ता सञ्चालन गरे पनि देश र जनताको हितमा काम गर्न नसक्दा व्यापक महँगी, भ्रष्टाचार, कुशासनको सामना जनताले गर्नुपरेको स्मरण गर्नुभयो ।
‘महँगी, भ्रष्टाचार र कुशासनबाट व्यापक असन्तुष्टिको फाइदा उठाई लोकप्रियतावादीले जनतामा व्यापक भ्रम पैदा गर्न सफल भए’ उहाँले भन्नुभयो ।
अध्यक्ष केसीले भदौ २३ गतेको जेनजी माग र शान्तिपूर्ण आन्दोलन जायज भए पनि राज्य पक्षबाट अनावश्यक बलप्रयोगका कारण १९ जना अबोध बालबालिकाको ज्यान जानु अत्यन्त दुखद घटना भएको बताउनुभयो ।
त्यो घटनाका दोषीमाथि कारबाहीको माग गर्दै उहाँले उक्त शान्तिपूर्ण आन्दोलनलाई टी.ओ.बी. लगायत अमेरिकाबाट परिचालित गैरजेनजीले आन्दोलनलाई हाइज्याक गरेको र भदौ २४ गते विध्वंस मच्याएर करिब ८५ अर्ब रुपियाँको क्षति र ७६ जनाले मृत्युवरण प्राप्त गरेको बताउनुभयो ।
विगतका सरकारबाट अमेरिकाले आई.पी.एस. अन्तर्गतक एमसिसी पारित गराउन सफल भए पनि त्यसको महत्त्वपूर्ण अङ्ग एस.पी.पी. पास गराउन त्यसको कठपुतली सरकार बाट मात्र सम्भव भएकाले रास्वपालाई करिब दुइतिहाई मतले विजयी गराएको दाबी केसीको थियो ।
‘भोट नेपाली जनताले दिए पनि त्यो वातावरण बनाउन अमेरिकी साम्राज्यवादको योजना र लामो प्रयत्नबाट सम्भव भएको हो’ उहाँले भन्नुभयो ।
राजमोबाहेक अन्य पार्टीले अमेरिकी साम्राज्यवाद विरुद्ध मुख खोल्न नसकेको स्पष्ट पार्दै उहाँले आफ्नो पार्टीले लामो समयदेखि सङ्घीयता विरुद्ध सदन र सडकबाट आवाज बुलन्द गर्दै आएको बताउनुभयो ।
अमेरिकी साम्राज्यवादले अहिले पनि विभिन्न कमजोर मुलुकमा लडाइँ गराउने काम गर्दै आएको पनि उहाँको विश्लेषण थियो ।
कार्यक्रममा मन्तव्य राख्दै वामपन्थी बुद्धिजीवी चेतनाथ आचार्यले फागुन २१ गतेको निर्वाचनमा राजमोले गणतन्त्र, राष्ट्रियता रक्षाकोे पक्षमा र सङ्घीयता खारेजीको लागि व्यापक जनतामाझ पुगेर जनचेतना फैलाएको बताउनुभयो ।
कार्यक्रममा राजमो केन्द्रीय सल्लाहकार बद्रे आलम र नेकपा (मसाल) रुपन्देहीका प्रवक्ता लालचन्द पन्तले पनि मन्तव्य राख्नुभएको थियो ।
कार्यक्रमको अध्यक्षता नगर समितिका उपाध्यक्ष कविराम भट्टराईले, स्वागत नगर समितिका सचिव सगीर आलमले र सञ्चालन राजमो नगर समितिका अध्यक्षता हीरालाल धामीले गर्नुभएको थियो ।
