१८ जेठ,जनकपुर । प्रधानमन्त्री केपी शर्मा ओलीले मधेश प्रदेश सरकारले अघि सारेको ‘एक निर्वाचन क्षेत्र : एक सडक’ कार्यक्रमअन्तर्गत ६४ वटा सडक आयोजनाको एकैपटक शिलान्यास गरेका छन् ।
जनकपुरधामस्थित महेन्द्रनारायण निधि सभागृहमा आयोजित कार्यक्रममा उनले विद्युतीय माध्यममार्फत ती सडक योजनाहरूको शिलान्यास गरेका हुन्।
भौतिक पूर्वाधार विकास मन्त्रालय, मधेश प्रदेशको आयोजनामा सम्पन्न कार्यक्रममा धनुषा, सर्लाही, महोत्तरी, सिरहा, रौतहट, बारा, पर्सा र सप्तरीका विभिन्न निर्वाचन क्षेत्रहरूमा पर्ने सडक योजनाहरू समावेश छन्। प्रदेश सरकारले यी योजनालाई आफ्नो गौरवको योजना मानेको छ।
प्रधानमन्त्री ओलीले कार्यक्रममा सम्बोधन गर्दै विकासको पूर्वाधार बिना मुलुकको समृद्धि सम्भव नरहेको उल्लेख गरे। “स्थानीय तहसम्म सडक पुगे विकासको ढोका खुल्छ,” उनले भने, “यी सडकहरूले प्रदेशको आर्थिक गतिविधिमा नयाँ गति ल्याउनेछन्।”
उनले सडक निर्माण गुणस्तरीय र तोकिएको समयसीमाभित्र सम्पन्न गर्न सरोकारवाला निकायहरूलाई निर्देशन दिए। प्रदेश सरकारले अघि सारेको योजनाले चुनावी क्षेत्रलाई न्यूनतम एक सडकसँग जोड्ने लक्ष्य राखेको छ।
कार्यक्रममा मधेश प्रदेशका मुख्यमन्त्री, भौतिक पूर्वाधार विकास मन्त्री, प्रदेशसभा सदस्य, संघीय सांसदहरू, स्थानीय जनप्रतिनिधि र सरोकारवाला निकायका अधिकारीहरूको उपस्थिति थियो।
मन्त्रालयका अनुसार सबै ६४ सडकको ठेक्का प्रक्रिया अगाडि बढिसकेको छ र चाँडै निर्माण कार्य सुरु गरिनेछ। बजेटको व्यवस्था भइसकेको र अनुगमनको संयन्त्र तयार पारिएको जानकारी दिइएको छ।
