११ वैशाख, काठमाडौं। नेकपा एमालेले आज काठमाडौंको भृकुटीमण्डपमा ‘युथ सेलेब्रेसन’ कार्यक्रम आयोजना गर्दैछ। ‘जनताले जितेको दिन’ भन्ने नारासहितको यो कार्यक्रम देशभरका युवाहरूलाई लोकतन्त्रप्रतिको चेतना अभिवृद्धि गराउने उद्देश्यले गरिएको हो।
कार्यक्रम दिउँसो १ बजेबाट सुरु हुनेछ। सातै प्रदेशबाट आएका युवाहरूको उपस्थिति रहने यस उत्सवमा, लोकतन्त्र र युवाको भूमिकामाथि विचार विमर्श हुनेछ। एमाले प्रचार विभाग प्रमुख राजेन्द्र गौतमका अनुसार, विभिन्न प्रतिनिधि वक्ताहरूले लोकतन्त्रमा युवाको योगदान, चुनौती र सम्भावनाबारे धारणा प्रस्तुत गर्नेछन्।
कार्यक्रममा सांस्कृतिक प्रस्तुति, युवाको आवाज समेटिएको वक्तव्य र प्रधानमन्त्री केपी शर्मा ओलीको विशेष सम्बोधनसमेत रहनेछ।
गौतमका अनुसार, ‘लोकतन्त्रको मर्म बुझाउने, युवा पुस्तालाई प्रेरित गर्ने र जनताको अधिकारप्रतिको सचेतना जगाउने उद्देश्यले युथ सेलेब्रेसन आयोजना गरिएको हो।’
एमालेले यो कार्यक्रमलाई लोकतन्त्र र विकासमा युवाको सक्रिय सहभागिता सुनिश्चित गर्ने अभियानका रूपमा लिएको बताइएको छ।
