सुदूरपश्चिम रोयल्सले सार्वजनिक गर्यो एन.पी.एल. २०८२ का लागि खेलाडी
७ असार,काठमाडौं । नेपाल प्रिमियर लिग (एन.पी.एल.) को आगामी सिजनका लागि सुदूरपश्चिम रोयल्सले आज रिटेन र रिलिज गरिएको खेलाडीहरूको सूची सार्वजनिक गरेको छ। टिमले रणनीतिक योजना अनुरूप पुराना अनुहारहरूलाई निरन्तरता दिँदै केही नयाँ अवसरका ढोका पनि खोल्ने तयारी गरेको छ।
राष्ट्रिय टोलीका उपकप्तान दिपेन्द्र सिंह ऐरीलाई पुनः मार्की खेलाडीको रूपमा कायम राख्दै सुदूरपश्चिम रोयल्सले उनको नेतृत्व क्षमतामा निरन्तर विश्वास प्रकट गरेको छ। ऐरीसँगै, पछिल्लो सिजनमा प्रभावशाली प्रदर्शन गरेका विनोद भण्डारी, आरिफ शेख, अविनाश बोहरा, ईशान पाण्डे र नरेन साउद पनि आगामी सिजनका लागि टोलीमै रहने भएका छन्। यी खेलाडीहरूलाई रिटेन गरेर टिमले अनुभव, निरन्तरता र सामूहिक समन्वयमा जोड दिएको स्पष्ट देखिन्छ।
यता, नयाँ सिजनको तयारीसँगै केही खेलाडीहरूलाई रिलिज गर्ने निर्णय गरिएको छ। अर्जुन कुमाल, नरेश बुढाथोकी, खडक बहादुर बोहरा, भोजराज भट्ट, अमित श्रेष्ठ र वसन्त खत्री अब आगामी सिजनमा सुदूरपश्चिम रोयल्सको जर्सीमा देखिने छैनन्। टिम व्यवस्थापनले यी खेलाडीहरूप्रति आभार प्रकट गर्दै भविष्यमा अझ उच्च सफलता प्राप्त होस् भन्ने शुभकामना पनि व्यक्त गरेको छ।
सुदूरपश्चिम क्षेत्रको पहिचान बोकेको यो फ्रेन्चाइज टोलीले टिम निर्माण प्रक्रिया अझ सुदृढ बनाउने उद्देश्यले आगामी दिनहरूमा खेलाडी ड्राफ्ट तथा ट्रायलहरू आयोजना गर्ने तयारी गरेको छ। नयाँ अनुहारहरूलाई मौका दिने नीति अनुरूप युवा र प्रतिभाशाली खेलाडीहरूलाई विशेष प्राथमिकता दिइने टिम स्रोतले जनाएको छ।
सुदूरपश्चिम रोयल्सले समर्थकहरू, खेलाडीहरू र सम्पूर्ण क्रिकेट परिवारप्रति आभार प्रकट गर्दै आगामी सिजनमा अझ सशक्त प्रदर्शन गर्ने प्रतिबद्धता व्यक्त गरेको छ।
