काठमाडौँ । राष्ट्रिय जनमोर्चाले रुकुम सोती घटनाको सम्बन्धमा रुकुम जिल्ला अदालतको फैसलालाई स्वागत गरेको छ ।
अध्यक्ष चित्रबहादुर केसीको हस्ताक्षरमा २०८० मङ्सिर २० गते बुधबार प्रेसवक्तव्य जारी गर्दै राजमोले फैसलाको स्वागत गरेको हो ।
वक्तव्यमा भनिएको छ : “नेपालको जातीय छुवाछूत विरुद्धको आन्दोलनमा रुकुम जिल्ला अदालतका न्यायाधीशले देखाएको साहस सधैँ प्रशंसनीय तथा सम्झनायोग्य रहने छ ।”
त्यस्तै, वक्तव्यमा जातीय छुवाछुतको विरुद्धमा देशव्यापी रूपमा चलेको आन्दोलनको सन्दर्भमा दोषीलाई कठघरामा ल्याउन सफल भएको धारणा पनि व्यक्त गरिएको छ ।
वक्तव्यको पूर्ण पाठ यस्तो छ :
“रुकुम सोतीको जघन्य हत्याकाण्डका दोषीलाई रुकुम जिल्ला अदालतले गरेको जन्मकैदको फैसलालाई हाम्रो पार्टी राष्ट्रिय जनमोर्चाले स्वागत गर्दछ । त्यसका साथै नेपालको जातीय छुवाछूत विरुद्धको आन्दोलनमा रुकुम जिल्ला अदालतका न्यायाधीशले देखाएको साहस सधैँ प्रशंसनीय तथा सम्झनायोग्य रहने छ ।
आजभन्दा साढे तीन वर्षअगाडि जाजरकोटका २१ वर्षीय नवराज विक आफ्नी प्रेमिकासँग विवाह गर्न रुकुम सोती गएका बेला त्यहाँका कथित माथिल्लो जातकाले नवराजसहित उनका ६ जना साथीलाई जातीय छुवाछुतका निहुँमा क्रुरतापूर्वक हत्या गरी सेतीनदीमा फालिदिएका थिए । सोती हत्याकाण्डका विरुद्ध देशव्यापी रूपमा आन्दोलन चलेको थियो । जातीय छुवाछुत विरुद्धको त्यो आन्दोलनप्रति हाम्रो पार्टीले पनि ऐक्यबद्धता प्रकट गरेको थियो ।
२०६३ सालमा पुनस्र्थापित संसद्ले नेपाललाई छुवाछुतमुक्त राष्ट्र घोषणा गरे पनि वा नेपालको संविधानमा जातीय छुवाछुत विरुद्धको अधिकारलाई मौलिक हकका रूपमा व्यवस्था गरे पनि दलितमाथि विभिन्न निहुँमा भेदभाव मात्र होइन, उनीहरूमाथि कैैयौँ हिंसात्मक घटना पनि हुने गरेका छन् । मन्दिरमा प्रवेश गरेका कारण वा माथिल्लो जातको केटीसँग प्रेम वा विवाह गरेका कारण वा सार्वजनिक स्थान धारा, होटल तथा दाहसंस्कार गर्ने घाट जस्ता कतिपय स्थान प्रयोग गरेका कारण कथित माथिल्लो जातका केही व्यक्तिबाट हत्या गर्ने, घरमा आगजनी गर्ने, सार्वजनिक बेइज्जती गर्ने जस्ता अमानवीय र जघन्य अपराध हुने गरेका छन् । सोतीको सामूहिक हत्याकाण्ड त्यसैको एउटा रूप, कडी र सिलसिला हो ।
आज जुन मात्रमा वा अनुपातमा दलित तथा महिलामाथि हिंसात्मक घटना घट्ने गरेका छन्, त्यसको तुलनामा ती घटनाको विरोध वा प्रतिरोध कम हुने गरेको छ । सोती हत्याकाण्डका विरुद्ध सम्पूर्ण दलित सङ्घसंस्था तथा सङ्गठनले देखाएको एकताको परिणाम नै दोषीलाई सजायको कठघरामा ल्याउन सफलता प्राप्त भएको हो ।
अन्त्यमा पुन: सोती हत्याकाण्डका दोषीले सजाय पाएकोमा प्रसन्नता प्रकट गर्दछौँ ।”
