४ वैशाख, काठमाडौं। राजधानीको पश्चिम भेगमा रहेको मातातीर्थ आज भावनाले भरिएको छ। बिहानको पहिलो किरणसँगै यहाँ पुगेका हजारौं मानिसहरूका आँखामा आँसु छ, हातमा पूजा सामग्री, र मनमा एउटै चाहना—दिवङ्गत आमाको आत्माको शान्ति।
कुण्ड वरिपरि श्रद्धालुहरूको लामो लाइन छ। कोही स्नान गर्दैछन्, कोही तर्पण, श्राद्ध र पूजा गर्दै छन्। पानीको सतहमा देखिने तरंगसँगै सम्झनाहरू पनि झल्किन्छन्—आमासँग बिताएका पलहरू, अधुरा कुराकानी, र कहिल्यै नसकिने माया।
आमा गुमाएका नरनारीका लागि यो दिन केवल परम्परा होइन, भावनाको विसर्जन हो। हरिहर (विष्णु र शिव) को दर्शन गर्दै उनीहरू आफ्ना आमाप्रति श्रद्धाञ्जली अर्पण गर्छन्।
जनविश्वास छ मातातीर्थ कुण्डमा स्नान गर्दा दिवङ्गत आमाले शान्ति पाउँछिन्। त्यही परिसरमा उभिएको ‘साझा आमा’को मूर्ति कलाकार रामकृष्ण भण्डारी को सिर्जना आज झनै अर्थपूर्ण देखिन्छ। त्यो मूर्तिले हरेकको आमालाई एउटै प्रतीकमा जोड्छ, जहाँ निजी पीडा सामूहिक अनुभूतिमा रूपान्तरण हुन्छ।
कसैले मीठा परिकार चढाएका छन्, कसैले फूल, कसैले केवल आँसु। तर सबैको भावना एउटै छ आमाको सम्झनामा एक दिन, एक तीर्थ, र अनन्त माया।
मातातीर्थ आज केवल धार्मिक स्थल होइन, सम्झना, श्रद्धा र भावनाको महासंगम बनेको छ। तस्बिर : स्यामसुन्दर गाैराे ।
