१२ वैशाख,काठमाडौं । जिल्ला प्रहरी कार्यालय इलामले लागूऔषध नियन्त्रण अभियान अन्तर्गत विशेष अपरेशन चलाउँदै ब्राउन सुगरसहित ५ जनालाई पक्राउ गरेको छ।
प्रहरी निरीक्षक संजिव बोगटीको कमाण्डमा खटिएको विशेष प्रहरी टोलीले इलाम नगरपालिकाका विभिन्न स्थानहरूमा छापा मारेर उनीहरूलाई पक्राउ गरेको हो।
पक्राउ परेकाहरूको शरीर तथा घर कोठा खानतलासी गर्दा जम्मा ३ ग्राम २५० मिलिग्राम लागूऔषध (ब्राउन सुगर) र विभिन्न कम्पनीका ५ थान मोबाइल फोन बरामद गरिएको प्रहरीले जानकारी दिएको छ।
पक्राउ परेकाहरूलाई जिल्ला प्रहरी कार्यालय इलाममा राखी थप अनुसन्धान भइरहेको छ।
प्रहरीका अनुसार पक्राउ पर्नेहरूमा इलाम नगरपालिका–४, पिपल बोटे निवासी सन्तोष उर्फ सन्तबिर तामाङ ९६० मिलिग्राम ब्राउन सुगर, ओपाे र रेडमी मोबाइल १/१ थान, इलाम नगरपालिका–६ निवासी नानु उर्फ बिजय नेम्बाङ लिम्बू १.९३० ग्राम ब्राउन सुगर, सन्दकपुर गाउँपालिका–४, माबु निवासी चेत बहादुर गुरूङ ३६० मिलिग्राम ब्राउन सुगर, रेडमी मोबाइल १ थान, इलाम नगरपालिका–७ निवासी सुप्रिम देवान रेडमी मोबाइल १ थान र झापा बिर्तामोड नगरपालिका–५ निवासी तथा हाल इलाम नगरपालिका–८ मा ग्यारेज सञ्चालन गर्दै आएका रोहित आलम रेडमी मोबाइल १ थान रहेका छन्।
प्रहरीका अनुसार बरामद लागूऔषध र मोबाइल फोनसहित पक्राउ परेका सबै व्यक्तिमाथि लागूऔषध सम्बन्धी मुद्दामा आवश्यक कारबाही प्रक्रिया अघि बढाइएको छ। इलाम प्रहरीले लागुऔषध नियन्त्रणलाई थप कडाइका साथ अघि बढाउने जनाएको छ।
