हेटौंडा, मकवानपुर – मकवानपुर जिल्लाको हेटौंडा उपमहानगरपालिका–१ चौकीटोलमा पारिवारिक विवादका कारण उग्र घटना घटेको छ।
घरायसी विवादका क्रममा २२/२३ वर्षीय राहुल भन्ने रमेश दासले खुकुरी प्रहार गरी आफ्नै दाजु २८ वर्षीय रुपेश दासलाई गम्भीर घाइते बनाएका छन्।
प्राप्त जानकारी अनुसार, २०८१ साल चैत १३ गते करिब १६:१० बजे रुपेश दास र उनका कान्छा भाई राहुल भन्ने रमेश दासबीच विवाद भएको थियो। सोही क्रममा रमेशले खुकुरी प्रहार गरी रुपेशको टाउको, दाहिने हात, तथा करङको भागमा गम्भीर चोट पुर्याएका थिए। प्रहरी टोली तत्कालै घटनास्थल पुगेर रमेशलाई खुकुरीसहित नियन्त्रणमा लिएको थियो।
तर, घटनाक्रम यतिमै सीमित थिएन। साँझ करिब २१:०० बजे थप दुःखद समाचार प्राप्त भयो। अनुसन्धानका क्रममा प्रहरी टोलीले सोही घरको माथिल्लो तलाको कोठामा ३५ वर्षीय गुडिया दास (रमेशका जेठी भाउजु) को शव फेला पारे। प्रारम्भिक अनुसन्धान अनुसार, रमेशले आफ्ना दाजु रुपेशमाथि आक्रमण गर्नु अघि नै जेठी भाउजुलाई धारिलो हतियार प्रहार गरी हत्या गरेको देखिएको छ।
प्रहरी अनुसन्धान जारी
घटनाको सूचना प्राप्त भएलगत्तै प्रहरी नायब उपरीक्षक (डीएसपी) स्यामु अर्याल नेतृत्वको टोली अनुसन्धानका लागि खटिएको थियो। प्रहरीले हाल रमेशलाई हिरासतमा लिएको छ भने गम्भीर घाइते रुपेश दासको सहकारी अस्पतालमा उपचार भइरहेको छ। मृतक गुडिया दासको शव घटनास्थलमै रहेको र आवश्यक कानुनी प्रक्रिया पूरा गरेपछि पोस्टमार्टमका लागि पठाइने बताइएको छ।
यस घटनाले स्थानीयहरूलाई स्तब्ध बनाएको छ। प्रहरीले घटनाको विस्तृत अनुसन्धान गरिरहेको छ भने पारिवारिक हिंसाजन्य घटनाहरू रोक्न सचेतना आवश्यक रहेको स्थानीय बासिन्दाले बताएका छन्।
